சித்திரை 3, 4 ம் பாதம்: உழைப்பும் திறமையும் நம்பிக்கையும் கொண்ட உங்களுக்கு, பிறக்கும் புரட்டாசி மாதம் கவனமாக செயல்பட வேண்டிய மாதம். உங்கள் சப்தமாதிபதி செவ்வாய் செப். 20 முதல் நீச்சம் அடைவதால் செயல்களில் கவனம் வேண்டும். தொழிலில் நிதானம் தேவை. பணியாளர்கள் கவனக்குறைவிற்கு இடம் கொடுக்காமல் செயல்படுவது நல்லது. மேலதிகாரியின் ஆதரவு உங்களைப் பாதுகாக்கும். உங்கள் லாபாதிபதி சூரியன் மாதம் முழுவதும் விரய ஸ்தானத்தில் சஞ்சரிப்பதால் பல வகையிலும் செலவு அதிகரிக்கும். எதிர்பார்ப்பு இழுபறியாகும். சிலருக்கு உடல்நிலையில் எதிர்பாராத சங்கடம் ஏற்படும். குடும்பத்திலும் ஏதேனும் பிரச்னை இருந்து கொண்டிருக்கும் என்பதால் திட்டமிட்டு செலவு செய்வதும், பெரியோரின் ஆலோசனையை ஏற்பதும் இந்த நேரத்தில் நன்மையளிக்கும். தம்பதியர் ஒருவருக்கொருவர் விட்டுக் கொடுத்துச் செல்வது நல்லது. ராசி நாதன் சுக்கிரன் மாதம் முழுவதும் சாதகமாக இருப்பதால் கலைஞர்களுக்கு எதிர்பார்த்த ஒப்பந்தம் கிடைக்கும். புகழும் செல்வாக்கும் ஏற்படும். அரசியல்வாதிகளுக்கு தலைமையின் ஆதரவும், புதிய பொறுப்பும் தேடி வரும். விவசாயிகளுக்கு விளைச்சலில் கூடுதல் கவனம் தேவை. பெண்களுக்கு இந்த மாதம் யோகமாக இருக்கும் என்றாலும், குடும்பத்தினர் ஆலோசனையை ஏற்பது நல்லது. மாணவர்களுக்கு செப்.23 முதல் படிப்பில் அக்கறை ஏற்படும். உயர் கல்வி முயற்சி சாதகமாகும்.

சந்திராஷ்டமம்: செப். 30, அக். 1

அதிர்ஷ்ட நாள்: செப். 18, 24, 27. அக். 6, 9, 15

பரிகாரம்: திருச்செந்துார் முருகனை வழிபட வாழ்வில் நன்மை உண்டாகும்.

சுவாதி: விரும்பியதை அடையக் கூடிய யோகம் கொண்ட உங்களுக்கு, பிறக்கும் புரட்டாசி மாதம் திட்டமிட்டு செயல்பட வேண்டிய மாதம். யோக, போகக்காரகன் ராகு பூர்வ புண்ணிய ஸ்தானத்தில் சஞ்சரிப்பதால் மனதில் தேவையற்ற குழப்பம் ஏற்படும். கற்பனை அதிகரிக்கும். சிலருக்கு காதல் உருவாகும். பிறருக்கு பயந்து வாழ்ந்து வந்த நிலை மாறும். ஞான மோட்சக்காரகன் கேது லாப ஸ்தானத்தில் சஞ்சரிப்பதால் தேவைக்கேற்ற பணம் வந்து கொண்டிருக்கும். வியாபாரம், தொழில் ஆதாயம் தரும். புதிய முதலீடுகளில் எதிர்பார்த்த லாபம் கிடைக்கும். புதிய நட்புகளால் உங்கள் நீண்ட நாள் கனவு நனவாகும். உங்களுக்குள் ஒரு நம்பிக்கை உண்டாகும். அதிர்ஷ்டக்காரகன் சுக்கிரன் மாதம் முழுவதும் சாதகமாக சஞ்சரிப்பதால் குடும்பத்தில் சுபிட்சம் இருக்கும். கையில் பணம் புரளும். உங்கள் எதிர்பார்ப்பு பூர்த்தியாகும். வீட்டிற்குத் தேவையான நவீன பொருட்கள் வாங்கிடக் கூடிய நிலையும் சிலருக்கு உண்டாகும். புதிய வீடு, வாகனம் என்ற நீண்ட நாள் முயற்சி வெற்றியாகும். செப். 23 முதல் உங்கள் பாக்யாதிபதியும் விரயாதிபதியுமான புதன் ஜென்ம ராசிக்குள் சஞ்சரிப்பதால் திடீர் பயணம் ஏற்படும். பயணத்தால் ஆதாயம் கிடைக்கும். செல்வாக்கு உயரும். சிலருக்கு எதிர்பார்த்த ஒப்பந்தம் கிடைக்கும். 6ம் இடத்தில் சஞ்சரிக்கும் சனி நீச்சம் அடைந்திருப்பதால் உடலில் சிறு சங்கடங்கள் வந்து போகும் என்றாலும் குரு பார்வையால் அவற்றிலிருந்து வெளியில் வருவீர்கள். பெண்களுக்கு எதிர்பார்ப்பு பூர்த்தியாகும். இழுபறியாக இருந்த வேலைகள் முடிவுக்கு வரும். வேலைக்காக முயற்சிப்பவர்களுக்கு தகுதியான வேலை கிடைக்கும். மனதிற்கு சந்தோஷமான நிலை உருவாகும். விவசாயிகள் நிதானமாக செயல்படுவது நல்லது. மாணவர்கள் ஆசிரியர்களின் ஆலோசனைகளை ஏற்பதால் படிப்பில் முன்னேற்றம் காண்பர். 

சந்திராஷ்டமம்: அக். 1

அதிர்ஷ்ட நாள்: செப். 22, 24. அக். 4, 6, 13, 15

பரிகாரம்: காளிகாம்பாளை வழிபட உங்களுக்கு ஏற்பட்ட சங்கடம் விலகும்.

விசாகம் 1, 2, 3 ம் பாதம்: லட்சியத்துடன் வாழும் உங்களுக்கு, பிறக்கும் புரட்டாசி நிதானமாக செயல்பட வேண்டிய மாதம். தன, புத்திரக்காரனான குரு பகவான் ஜீவன ஸ்தானத்தில் சஞ்சரிப்பதால் வேலையில் நெருக்கடி, எதிர்பாராத பிரச்னைகளும் ஏற்படும். உடன் பணி புரிபவர்களுக்கும் உங்களுக்கும் இணக்கமற்ற நிலை உருவாகும். சிலர் மேலதிகாரியின் கண்டிப்பிற்கு ஆளாக நேரும் என்பதால் வேலையில் கவனம் செலுத்துவது நன்மையளிக்கும். சிலருக்கு இடமாற்றம் ஏற்படலாம். தனியார் நிறுவனத்தில் வேலை பார்த்து வருபவர்கள் நிர்வாகத்தின் அதிருப்திக்கு ஆளாக வேண்டி வரும். குருவின் பார்வைகள் 2, 4, 6 ம் இடங்களுக்கு கிடைப்பதால் குடும்பத்தில் நிம்மதியும் மகிழ்ச்சியும் இருக்கும். கொடுத்த வாக்கை காப்பாற்ற முடியும். கையில் பணம் புரளும். எதிர்பார்ப்பு நிறைவேறும். தாய்வழி உறவினரின் ஆதரவு கிடைக்கும். உடலில் ஏற்பட்ட பிரச்னைகள், தொழிலில் ஏற்பட்ட நெருக்கடி, இழுபறியாக இருந்த வழக்குகள் எல்லாம் தீரும். செல்வாக்கு உயரும். ராசிநாதன் சஞ்சாரம் மாதம் முழுவதும் சாதகமாக இருப்பதால் கணவன், மனைவிக்குள் ஏற்பட்ட பிரச்னைகள் விலகும். சுயதொழில் செய்வோருக்கு ஆதாயம் அதிகரிக்கும். உங்களுக்கு குடும்பம், களத்திரம் ஸ்தானாதிபதியான செவ்வாய் செப்.20 முதல் நீச்சம் அடைவதால் குடும்பத்தினரையும் வாழ்க்கைத் துணையையும் அனுசரித்துச் செல்வது அவசியம். பணவிகாரங்களில் கூடுதல் அக்கறை தேவை. புதிய முதலீடுகளில் எச்சரிக்கை அவசியம். பெண்கள் தங்கள் பொறுப்புணர்ந்து நடப்பது நன்மையை உண்டாக்கும். விவசாயிகள் கால நிலை அறிந்து செயல்படுவது அவசியம். மாணவர்களுக்கு படிப்பில் முன்னேற்றம் ஏற்படும்.

சந்திராஷ்டமம்: அக். 2

அதிர்ஷ்ட நாள்: செப். 21, 24, 30. அக். 3, 6, 12, 15

பரிகாரம்: மாசாணி அம்மனை வழிபட மனதில் இருந்த குறைகள் விலகும்.