விறகு வெட்டியாய் வேடம் தாங்கினான். தெருத்தெருவாய் விறகு விற்று அலைந்தான். விலை கேட்போருக்கு வாங்க முடியாத அளவு அதிகவிலை கூறினான். மாலை மயங்கும் நேரத்தில் ஏமநாதன் தங்கி உள்ள வீட்டுத்திண்ணையில் வந்து அமர்ந்தான். சாதாரிப்பண்ணில் இனிய இசை பாடினான். ஆம், ஆடவல்லான் பக்தனுக்காக இசை பாடவும் வல்லானானான்! இசையில் மயங்கிய ஏமநாதன் விறகு வெட்டியிடம், ‘நீ யாரப்பா?’ என்று கேட்டான்.

“நான் பாணபத்திரனின் மாணவன் என்றாலும் இசைபாட தகுதிஇல்லை என்று என்னை ஒதுக்கி விட்டார்!” என்றதும் திகைத்தான் ஏமநாதன். தகுதி அற்ற மாணவனின் இசை அதை கற்பிக்கும் ஆசிரியர் பாணபத்திரனின் இசை நினைத்துப் பார்த்ததும் நடுங்கியது ஏமநாதனின் மனம். பாணபத்திரனுடன் இசைப்போட்டியில் கலந்து கொள்ளப் பயந்த ஏமநாதன் இரவோடிரவாக ஓடிவிட்டான். அன்றிரவே பாணபத்திரனின் கனவில் தோன்றிய இறைவன் நடந்ததைத் தெரிவித்தார். மறுநாள் பாணபத்திரன் இவ்வதிசயத்தை எம்பெருமானின் திருவிளையாடலை மன்னனிடம் தெரிவித்தான். ஈசனின் அருட்திறத்தை எண்ணி வியந்தனர்.