மிருகசீரிடம் - 3, 4: புதிய முயற்சிகளில் திட்டமிட்டு வெற்றி பெறும் உங்களுக்கு இந்த ஆண்டு குடும்பத்தில் சுபநிகழ்ச்சி நடக்கும். சுபச்செலவு உண்டாகும். பல வகையிலும் முயன்று வருமானத்தை ஈட்டுவீர்கள். குடும்பத்தினருடன் விட்டுக் கொடுத்து நடந்து கொள்வீர்கள். சிலர் சொந்த வீடு வாங்குவர். உங்கள் பொறுப்புகளை எவ்வளவு விரைவில் முடிக்க முடியுமோ அவ்வளவு விரைவில் முடித்து விடுவீர்கள். தெய்வீக காரியங்களில் ஈடுபாடு கூடும். பயணங்கள் மூலம் புதிய வாய்ப்புகளைப் பெறுவீர்கள். உங்களைத் தேடி சுபச்செய்திகள் வந்து சேரும். அரசு மூலம் ஏற்பட்ட  கெடுபிடிகள் குறையும். சமுதாயத்தில் உயர்ந்தோரை நாடிச் சென்று அவர்களின் ஆலோசனைகளால் பயனடைவீர்கள். கடினமான செயல்களைச் செய்து முடிக்க உடல்நிலை ஒத்துழைக்கும்.  சொத்துக்களை விற்று தொடர் வருமானம் தரும் முதலீடுகளைச் செய்வீர்கள். புதியவர்கள் நட்புக் கொள்ள அழைப்பார்கள். அதேநேரம், உங்கள் செயல்களை ஆரவாரம் இன்றி செய்யுங்கள். ரகசியங்கள் வெளியில் தெரியாமல் கவனமாக இருக்கவும். முரண்டு பிடிக்கும் நண்பர்களிடமிருந்து விலகி விடவும். இதனால் புதுப்பிரச்னை ஏற்படாமல் பார்த்துக் கொள்ளலாம். பிள்ளைகளைத் தட்டிக் கொடுத்துச் சென்று அவர்களால் எந்த பிரச்னையும் நேராமல் பார்த்துக் கொள்ளுங்கள்.
பணியாளர்களுக்கு விரும்பும் இடமாற்றம் கிடைக்கும். ஆனால் மேலிடத்துடன் இணக்கமாகச் செல்வது நல்லது. சக ஊழியர்கள் ஆதரவாக இருப்பர். உங்கள் மீது பிறர் வீண் குற்றச்சாட்டு சுமத்த நேரலாம். கவனம். குடும்பத்தை விட்டு சிறிது காலம் பிரியும் சூழல் ஏற்படலாம். பணிகளின் நிமித்தமாக அடிக்கடி பிரயாணம்
ஏற்படும். நீங்கள் செய்யும் பணிகளின் மீது அதிக கவனம் செலுத்துவது நல்லது. உங்களிடம் இருக்கும் ஆவணங்களை சரியான முறையில் பாதுகாப்பது அவசியம். மறைமுக எதிர்ப்புகளைச் சமாளிக்க எந்த சூழ்நிலையிலும் நியாயத்தின் பக்கம் நிற்பது நன்மை தரும்.
தொழில் துறையினருக்கு போட்டியாளர்கள் மூலம் மன உளைச்சல் ஏற்படலாம். உங்களிடம் வேலை பார்க்கும் தொழிலாளர்களிடம் கனிவான உறவை கடைபிடிப்பது நல்லது. அதிக வருமானம் பெற அதிகமாக உழைக்க வேண்டியதிருக்கும். பங்குதாரர்களிடம் விட்டுக் கொடுப்பது அவசியம். உப தொழிலை ஆரம்பிக்க வாய்ப்பு கிடைக்கும். எந்த யோசனையையும் சரியான ஆலோசகர்களிடம் கலந்துரையாடி முடிவெடுங்கள். கடந்த காலத்தில் ஏற்பட்ட கஷ்டம் அனைத்தும் நீங்கும். கூட்டுத்தொழில் ஆரம்பிக்கும் முன் ஆவணங்களை சரியாக பார்த்து முடிவெடுங்கள். முடிந்த வரை  பொறுமையைக் கடைபிடிப்பது நன்மை தரும். கடன்கள் அடைபடும். பணம் புழங்கும் இடங்களில் நம்பிக்கையானவர்களை நியமிப்பது நல்லது.
கலைத்துறையினர் சிறு வாய்ப்பைக் கூட வீணாக்காமல் பயன்படுத்துவது நல்லது. உங்கள் திறமைகளை வெளிக்கொண்டு சிறந்த காலகட்டம் இது. பாராட்டு, புகழ், விருது உங்களைத் தேடி வரும். பாடலாசிரியர், இசை, நடனக்கலைஞர்களுக்கு ஜூன் மாதத்திற்குப் பிறகு பொன்னான காலகட்டமாக இருக்கும். சக கலைஞர்களிடம் சுமூகமாக நடப்பது நல்லது. வெளியூர் பயணங்களின் போது உடைமைகளை அக்கறையுடன் பார்த்துக் கொள்ளவும்.
மாணவர்களுக்கு கல்வியில் ஆர்வக் குறைவு ஏற்படலாம். மனதை ஒரு நிலையாக்கிக் கொள்ளவும். உடல்நலக்குறைவால் சில தடைகள் ஏற்படலாம். உடல்நலத்தைப் பேணுவதில் அக்கறை அவசியம். விளையாட்டில் சாதனை படைப்பீர்கள். அதிக மதிப்பெண்கள் எடுப்பதற்கு விடாமுயற்சி தேவை. சோம்பல் கூடவே கூடாது. நினைவாற்றலைப் பெருக்கும் பயிற்சிகளை மேற்கொள்ளுங்கள். தீய நண்பர்களிடமிருந்து சற்று விலகியிருப்பது நல்லது.
அரசியல்துறையினருக்கு உங்கள் மீது தலைமை அதிக நம்பிக்கை கொள்ளும். உங்கள் நண்பர்களே உங்களுக்கு எதிராக செயல்படலாம். ஆனாலும் புரிந்து கொண்டு செயல்படுவது நன்மை தரும். உங்களுடைய விசுவாசத்திற்கு மேலிடம் உங்களுக்கு சரியான பதவி அளிப்பர். சிலருக்கு சுழல் விளக்குடன் பயணம் செய்யும் வாய்ப்பு கிட்டும். அதே வேளையில் மனஉறுதியை வளர்த்துக் கொள்வது நல்லது.
பெண்களுக்கு குடும்பத்தில் கலகலப்பு அதிகரிக்கும். நெருக்கடி நேரத்தில் பொறுமையை கடைபிடிப்பது சிறந்தது. குடும்பத்தில் அனைவரிடமும் விட்டுக் கொடுத்து போவது நன்மை தரும். . தேவையற்ற கோபத்தை விட்டுத் தள்ளுங்கள். அக்கம்பக்கத்தினருடன் அளவோடு நட்பு வைப்பது அவசியம். கர்ப்பணிகளுக்கு நிதானமும், பொறுமையும் தேவை.
பரிகாரம்: குலதெய்வத்தை தினமும் வணங்க நன்மை அதிகரிக்கும். எதிர்பார்த்த வெற்றி கிடைக்கும். 

அதிர்ஷ்ட எண்: 2, 6, 7, 9

நிறம்: வெள்ளை, சிவப்பு